Аршалы ауданында: инвестициялар өсімі, ауылдарды газдандыру және өндірістік серпіліс
Аршалы ауданында 2025 жылдың алғашқы бес айындағы әлеуметтік-экономикалық даму қорытындылары шығарылды. Бұл туралы аудан әкімі Өңірлік коммуникациялар қызметінде өткен брифингте мәлімдеді. Аудан негізгі көрсеткіштер бойынша тұрақты өсімді көрсетіп, мемлекеттік саясат аясында ауқымды инфрақұрылымдық жобаларды жүзеге асырып жатыр.
2024–2025 жылғы жылыту маусымы ақаусыз аяқталды, қазандық жабдықтары мен жылу желілеріне техникалық диагностика жүргізілді. Аршалыдағы қазандықтарды газдандыру жобалары әзірленіп жатыр.
Ауыл шаруашылығы саласы көктемгі егіс жұмыстарына белсенді қатысуда. 78 мың гектардан астам жерге дәнді дақылдар егілді, оның ішінде 63 мың гектары – бидай. Аграрлық сектор жаңа техникамен жабдықталып, «Кең дала» мен «Форвардтық сатып алу» бағдарламалары арқылы қолдау көріп отыр. Мал шаруашылығында ІҚМ, жылқы мен қой басы көбейіп, сүт, жұмыртқа және ет өндіру көлемі артты. Сонымен қатар «Temir Agro» ЖШС-ның 600 басқа арналған сүт фермасы жобасы іске асырылуда.
Өнеркәсіп саласы да дамуда: бірінші тоқсандағы өндіріс көлемі 25 млрд теңгені құрады, өңдеу және тау-кен секторларында өсім бар. 15 МВт қуаттылықтағы жел электр станциясы іске қосылды, ал республикалық маңызы бар «AQMOLA» индустриялық аймағында жалпы инвестиция көлемі триллион теңгеден асатын жобалар жоспарланған. Инвесторлар қатарында Қытай, Сингапур және Қазақстан компаниялары бар.
Құрылыс саласында 10-нан астам ірі жоба жүзеге асырылып жатыр: тұрғын үй алаптары, туристік аймақтар, зауыттар мен логистикалық орталықтар. Аяқталған жобалардың бірі — Берсуат ауылындағы қойма кешені. Негізгі капиталға салынған инвестиция көлемі — 7 млрд теңге, оның 2,1 млрд теңгесі — жекеменшік қаражат.
Тұрғын үй-коммуналдық шаруашылық негізгі басымдықтардың бірі. 2023 жылдан бастап ауданға магистральдық газ құбыры тартылып, 17 елді мекен қосылды. Биыл тағы 4 ауыл мен әлеуметтік нысандар газдандырылады. Жол жөндеуге қосымша қаржы бөлініп жатыр, дегенмен бұрын басталған жобаларды аяқтау үшін 4 млрд теңгеден астам қаражат қажет. Сондай-ақ ауданның барлық ауылдарын қамтитын әлеуметтік автобус бағытын іске қосу жоспарда бар.
Агломерациялық дамуға да ерекше көңіл бөлінуде. Тек Жібек жолы ауылында су, электр желілері, жолдар, демалыс және дене шынықтыру-сауықтыру кешенінің құрылысы жүргізілуде. Мұндай жұмыстар Костомар ауылында да басталды. Аршалы кентінде 100 пәтерлі көпқабатты үй салынуда.
Әлеуметтік салада көпбалалы және аз қамтылған отбасыларға, ардагерлерге, ауылдық мамандарға қолдау шаралары жүзеге асырылуда. Алғаш рет тұрғын үй-коммуналдық шығындар бойынша көмек тек мұғалімдерге ғана емес, медицина, мәдениет және спорт қызметкерлеріне де берілуде. 2025 жылы әлеуметтік көмек көлемі 368 млн теңгені құрайды.
Ауданда 29 мектеп пен 16 медицина мекемесі бар. Жаңғырту аясында химия және инклюзивті оқыту кабинеттері жабдықталды, төрт мектепте газбен жылыту жүйесіне көшу жұмыстары жүріп жатыр. Дегенмен денсаулық сақтау саласында кадр тапшылығы сақталуда: терапевт, фельдшер және кіші медициналық қызметкерлер қажет. Аудандық ауруханада күрделі жөндеу жұмыстары жалғасуда, Арнасайда жаңа амбулаторияның құрылысы аяқталуда.
Халық санының артуына байланысты Жібек жолы ауылында екі жаңа мектеп салу мәселесі өзекті. Сонымен қатар, Қойгелді ауылында балалар хоккейін дамытуға арналған спорт базасының жобасы қарастырылуда.
Аудан әкімі атап өткендей, барлық қойылған міндеттердің орындалуы облыс әкімдігі мен барлық деңгейдегі атқарушы билік өкілдерінің қолдауының арқасында мүмкін болып отыр. Басты назарда – тұрғындардың өмір сүру сапасы мен табысын арттыру.
