2024 жылы Ақмола облысында мемлекеттік бақылау мен қадағалау жұмыстары жанданып, өңірдің 325 кәсіпорны мен ұйымы қамтылды. Өткен жылмен салыстырғанда бұл көрсеткіш айтарлықтай артты, ал заңбұзушылықтар санының өсуі, өз кезегінде, тұтынушылардың қауіпсіздігін қамтамасыз ету жолындағы күш-жігердің нәтижесі ретінде қабылданады, бұл туралы Техникалық реттеу және метрология комитетінің Ақмола облысы бойынша департаментінің басшысы Нұрбек Хабиев брифингте мәлімдеді, деп хабарлайды Өңірлік коммуникациялар қызметінен.
Департамент жұмысының ауқымы кеңейіп, тек ірі кәсіпорындар ғана емес, сауда, денсаулық сақтау, білім беру, көлік және ветеринария сияқты түрлі салалардағы субъектілер де бақылауға алынды. Облыс орталығы Көкшетау мен басқа да қалалардағы ірі кәсіпорындармен бірге, шағын және орта бизнестің де заң талаптарына сәйкестігі тексерілді. Бұл қадам өңірдегі экономикалық процестердің заңдылығын қамтамасыз етуге бағытталды.
«2024 жылы өнімдердің айналымын бақылау бағытында бірқатар тексерулер жүргізілді. Нәтижесінде, сатуға шығарылған өнімдерде талаптарға сай келмейтін көптеген бұзушылықтар анықталды. Мысалы, бір сауда нүктесінде сапа паспортысыз сатылып жатқан өнімдер тіркелді. Мұндай жағдайлар анықталған кезде тиісті шаралар дер кезінде қабылданды» , дейді спикер.
Өткен жылы өлшем бірліктерін қадағалау да ерекше маңызды болды. Облыстың бірнеше өндірістік ұйымы мен сауда орындарында өлшеу құралдары тексеріліп, кейбір құралдардың қолданылуына тыйым салынды. Бұл шаралар өлшеу дұрыстығын қамтамасыз етіп, технологиялық процестердің тиімділігін арттыруға ықпал етті.
Нұрбек Хабиевтің айтуынша, сәйкестікті бағалау саласындағы бақылау шаралары да жалғасын тапқан. Бұл салада бірнеше заңбұзушылықтар анықталды, оның ішінде өнімнің қауіпсіздік сертификаттарының дұрыс берілмегендігі мен аккредиттеу талаптарының сақталмауы жағдайлары болды. Мұндай олқылықтар нарықтағы өнімдердің сапасын бақылауды одан әрі жетілдіру қажеттілігін көрсетті.
«Зергерлік бұйымдар нарығындағы бақылау да маңызды бағыттардың бірі болды. Облыс аумағында тіркелген зергерлік дүкендердің өнімдеріне қатысты бақылау шаралары жүргізіліп, 26 мыңнан астам бұйымның таңбалауы жүзеге асырылды. Бұл шара тұтынушылардың құқықтарын қорғауға бағытталған әрі сапасыз өнімдердің нарықта айналуын болдырмауға ықпал етті», деп толықтырды ол.
Ақмола облысының мемлекеттік бақылау органдары өзара тығыз қарым-қатынаста жұмыс істеп, өңірдегі ішкі нарықтың қауіпсіздігін қамтамасыз етті. Ішкі нарықты қорғау мақсатында өткен жыл ішінде бірнеше маңызды отырыстар ұйымдастырылды. Бұл кездесулер барысында аттракциондар мен импорттық өнімдерге қатысты мәселелер талқыланып, тиісті шешімдер қабылданды.
Ақмола облысындағы мемлекеттік бақылау жұмыстарының нәтижелері өңірде тұтынушылардың қауіпсіздігін қамтамасыз ету, заңбұзушылықтарды уақытында анықтап, оларды жою бағытында тиімді жұмыс жүргізіліп жатқанын көрсетеді. Департаменттің жұмысы өңірдегі кәсіпорындардың сапалы қызмет көрсетуін қамтамасыз етуге, ал тұтынушылардың құқықтарын қорғауға зор үлес қосуда.
