Қоғамдағы тұрақтылық пен қауіпсіздік әр азаматтың құқықтары мен заңды мүдделерінің қорғалуынан басталады. Осы тұрғыда Мемлекет басшысы айқындаған «Заң мен Тәртіп» қағидаты қоғамда өзара құрметті, жауапкершілікті және құқықтық мәдениетті нығайтуға бағытталған. Бұл міндеттерді жүзеге асыруда буллингтің алдын алу ерекше маңызға ие.
Буллинг – адамның ар-намысы мен қадір-қасиетін қорлауға, психологиялық немесе физикалық қысым көрсетуге бағытталған жүйелі әрекет. Ол көбіне білім беру ұйымдарында кездескенімен, бүгінде әлеуметтік желілер мен түрлі цифрлық платформалар арқылы да кең таралуда.
Буллингтің кез келген түрі адамның қауіпсіз ортада өмір сүру құқығын бұзады. Сондықтан оған қарсы күрес тек педагогтердің немесе ата-аналардың ғана емес, бүкіл қоғамның ортақ міндеті болып табылады. Әрбір азамат заң талаптарын сақтап, өзгелердің құқықтары мен бостандықтарын құрметтеуге тиіс.
«Заң мен Тәртіп» тұжырымдамасының негізгі мақсаты – құқық бұзушылықтың алдын алу және қоғамда жауапкершілік мәдениетін қалыптастыру. Бұл қағидат буллингке де тікелей қатысты. Өйткені құрдасын қорлау, кемсіту немесе оған қысым көрсету қоғамдық тәртіпке қайшы әрекет болып саналады.
Әсіресе кибербуллинг мәселесі алаңдатарлық. Интернет кеңістігінде жасалған қорлау, жалған ақпарат тарату немесе әдейі келемеждеу адамның психологиялық жағдайына кері әсер етіп, ауыр салдарға әкелуі мүмкін. Сондықтан жастар арасында цифрлық мәдениетті қалыптастыру және интернеттегі жауапты мінез-құлық қағидаларын түсіндіру маңызды.
Буллингтің алдын алудың тиімді жолдарының бірі – құқықтық сауаттылықты арттыру, өзара сыйластық пен толеранттылық құндылықтарын дәріптеу. Білім беру ұйымдарында түсіндіру жұмыстарының жүйелі жүргізілуі, ата-аналар мен педагогтердің бірлескен әрекеті қауіпсіз орта қалыптастыруға мүмкіндік береді.
Заң үстемдігі мен қоғамдық тәртіп қағидаттары берік орныққан қоғамда буллингке орын болмауы тиіс. Әрбір азамат өз іс-әрекетіне жауапкершілікпен қарап, өзгелердің құқықтарын құрметтеген жағдайда ғана қауіпсіз әрі әділетті қоғам құруға болады.
