7 мамырдан бастап Ақмола облысының барлық қалалары мен аудандарында Ұлы Жеңістің 80 жылдығына арналған ерекше патриоттық акция бастау алды. Биылғы жылы облыс көлемінде 45 мың дана «Жеңіс лентасы» таратылды.
Мерекенің жақындағаны көшелердегі көңіл күйден-ақ сезіледі. Аспан түстес көгілдір және ортасында алтын түсті ұлттық өрнекпен безендірілген Жеңіс лентасы – елінің бейбітшілігі мен ата-бабалар ерлігінің жарқын нышанына айналды.
Ленталар қала тұрғындарына, жастарға, қонақтарға, мекеме қызметкерлеріне таратылып, әр адамның кеудесінде өткенге деген құрмет пен мақтаныштың белгісіндей жарқырап тұр. Бұл тек лента ғана емес – бұл жүректегі Жеңіске деген алғыс пен тағзым.
Акцияны ұйымдастырушылардың айтуынша, мұндай бастамалар ұрпақтар сабақтастығын нығайтып, Отанға деген сүйіспеншілікті арттырады. «Жеңіс лентасы» – бейбіт өмір үшін жанын қиған батырларды еске алудың, олардың рухына тағзым етудің көрінісі.
Көкшетаудың алаңдарында, көшелерінде, оқу орындары мен мекемелерінде ленталар салтанатты түрде үлестірілді. Жастар ерекше ықыласпен қабылдап, лентаны кеуделеріне тағып, майдангер ата-әжелерінің рухына құрмет білдірді.
Ұлы Жеңіс күні жақындап келеді. Осындай символикалық акциялар елдің әр азаматының жүрегінде сол бір тарихи күннің маңызын еске салып, елдік пен бірліктің қадірін арттырып отыр.
