Ақмола облысында ауыл тұрғындарын сапалы және қолжетімді медициналық көмекпен қамтамасыз етуге бағытталған «Ауылдық денсаулық сақтауды жаңғырту» ұлттық жобасының жүзеге асырылуы жалғасуда. Жаңа амбулаториялар салу, ауруханаларға күрделі жөндеу жүргізу және оларды заманауи жабдықтармен жарақтандыру – осы ауқымды жұмыстың басты бағыттары.
Бүгінгі таңда жоба аясында өңірде алғашқы медициналық-санитарлық көмек көрсететін 28 нысан салынып, пайдалануға берілді. Бұл дегеніміз, ауыл тұрғындары енді базалық медициналық қызметтер алу үшін аудан орталығына барудың қажеті жоқ.
Жарқын мысал ретінде – Зеренді ауданы, Айдабол ауылындағы жаңа дәрігерлік амбулаторияны айтуға болады. А. ж. 5 ақпанында ашылған 448 шаршы метрлік заманауи ғимарат қажетті жабдықтармен толық жарақталған: жалпы тәжірибелік дәрігер кабинетінен бастап физиотерапия бөлімі, жедел медициналық жәрдем пункті бар. Ауыл тұрғындары енді өз елді мекенінен шықпай-ақ мамандардың кеңесін алып, УДЗ, ЭКГ және түрлі терапия түрлерінен өте алады.
«Енді бізде заманауи амбулаторияның бар екеніне қатты қуаныштымын. Бұл шынымен де өзімізді жақсы және ертеңгі күнге сенімді болуға көмектеседі. Енді аудан орталығына көшудің қажеті жоқ», – дейді Айдабол ауылының тұрғыны Сәуле Сағадиева.
Ұлттық жоба жаңа нысандар салумен ғана шектелмейді. Степногорск және Атбасар қалаларында көпбейінді ауруханаларды кең көлемде жаңғырту жұмыстары жүргізілуде. Атбасар ауруханасында шатыр, қасбет және жылыту жүйесі жаңартылды, қазіргі уақытта ішкі әрлеу жұмыстары жүргізілуде. 2024 жылы екі аурухананы күрделі жөндеуге 912,6 млн теңге бөлінді, ал 2025 жылы 464,2 млн теңге қосымша қаржыландыру қарастырылған. Барлық жұмыстарды ағымдағы жылы аяқтау жоспарланып отыр.
Жаңғыртудың маңызды құрамдас бөлігі – ауруханаларды заманауи медициналық жабдықтармен жарақтандыру. 2024 жылы Степногорск және Атбасар ауруханалары үшін 3,2 млрд теңгеге 111 бірлік техника сатып алынды. 2025-2026 жылдары екі МРТ аппаратын сатып алу жоспарлануда, бұл диагностика мен емдеу сапасын айтарлықтай арттырады.
«Ауруханаларды жаңғырту медициналық қызметтердің сапасын айтарлықтай жақсартуға және пациенттер үшін жайлы жағдайлар жасауға мүмкіндік береді. Мұның бәрі Мемлекет басшысы Қасым-Жомарт Тоқаевтың тапсырмаларына сәйкес жүзеге асырылуда. Біз медициналық мекемелерді заманауи жабдықтармен қамтамасыз ету бойынша жұмысты жалғастыратын боламыз», – деп атап өтті Ақмола облысы денсаулық сақтау басқармасы басшысының міндетін атқарушы Елена Иванова.
Айта кету керек, өңірде осы жоба аясында тағы бірнеше нысанның құрылысы жалғасуда.
